CASUAL LEAVE

സാധാരണ അവധിക്കും പ്രത്യേക അവധിക്കും പുറമേ ഒരു വര്‍ഷം പരമാവധി 20 ദിവസത്തെ കാഷ്വല്‍ അവധി അനുവദിക്കാവുന്നതാണ്‌.എന്നാല്‍ അവധിക്കാലമുള്ള ജീവനക്കാര്‍ക്ക്‌ ഇത്‌ 15 ദിവസമേയുള്ളൂ.കാഷ്വല്‍ അവധിയുടെ കണക്ക്‌ പ്രത്യേകം രജിസ്റ്ററില്‍ എഴുതി സൂക്ഷിക്കുന്നു.അവധിക്കാലം ഡ്യൂട്ടിയായി തന്നെ കണക്കാക്കുന്നു.അതിനാല്‍ ശമ്പളബില്ലിലോ സര്‍വീസ്‌ ബുക്കിലോ കാഷ്വല്‍ അവധി രേഖപ്പെടുത്തുന്നില്ല.ശമ്പളത്തില്‍ കുറവും ഉണ്ടാകുന്നില്ല.കാഷ്വല്‍ അവധി സംബന്ധിച്ച മറ്റു നിബന്ധനകള്‍

1)20 ദിവസമെന്നത്‌ പരമാവധി അനുവദിക്കാവുന്ന അവധിയാണ്‌.
എന്നാല്‍ അത്രയും അവധിക്ക്‌ അവകാശമുണ്ടന്നോ അര്‍ഹനാണന്നോ വിവക്ഷിക്കേണ്ട.ഒരു വര്‍ഷത്തില്‍ താഴെ സര്‍വീസുള്ള ജീവനക്കാര്‍ക്കും മേലുദ്യോഗസ്ഥന്റെ വിവേചനം പോലെ 20 ദിവസം അനുവദിക്കാവുന്നതാണ്‌
2)ആഫീസ്‌ തലവനാണ്‌ കീഴുദ്യോഗസ്ഥര്‍ക്ക്‌ ലീവ്‌ അനുവദിക്കുവാന്‍ അധികാരപ്പെട്ട ഉദ്യോഗസ്ഥന്‍.കീഴുദ്യോഗസ്ഥന്‍ അവധിക്ക്‌ മുന്‍ കൂട്ടി അനുവാദം വാങ്ങിയിരിക്കണം.എന്നാല്‍ ആഫീസ്‌ മേധാവിക്ക്‌ ലീവ്‌ ആവശ്യമുള്ള പക്ഷം വിവരം മേലുദ്യോഗസ്ഥനെ അറിയിച്ചാല്‍ മതി
3)ഉച്ചയ്ക്ക്‌ മുന്‍പോ പിന്‍പോ ആയി അരദിവസത്തെ അവധി അനുവദിക്കാവുന്നതാണ്‌
4)കാഷ്വല്‍ അവധി മറ്റൊരു അവധിയുമായി ചേര്‍ത്ത്‌ അനുവദിക്കുന്നതല്ല.അതായത്‌ ആര്‍ജിതാവധി,അര്‍ദ്ധവേതനാവധി എന്നിവയോട്‌ ചെര്‍ത്ത്‌ കാഷ്വല്‍ അവധി പറ്റില്ല എന്നര്‍ത്ഥം
5ാ‍മ്രിക്കല്‍ അനുവദിച്ച അവധി പിന്നീട്‌ മറ്റൊരവധിയായി പരിവര്‍ത്തനം ചെയ്യുവാന്‍ അനുവാദമില്ല.എന്നാല്‍ അനുവദനീയമായ അവധിയില്‍ കൂടുതല്‍ ഉപയോഗിച്ചാല്‍ പരിവര്‍ത്തനം ചെയ്ത്‌ മറ്റേതെങ്കിലും അവധിയായി മാറ്റാവുന്നതാണ്‌
5)പ്രവേശനകാലത്തോട്‌ ചേര്‍ന്ന് കാഷ്വല്‍ അവധി അനുവദിക്കില്ല.എന്നാല്‍ വകുപ്പ്‌ അദ്ധ്യക്ഷന്‌ മറ്റ്‌ നിയമതടസമില്ലങ്കില്‍ അനുവാദം നല്‍കാവുന്നതാണ്‌

Read more »

VERIFICATION OF CHAR ACTOR AND ANTECEDENTS

സംസ്ഥാന സര്‍വീസിലേക്ക്‌ നിയമിക്കപ്പെടുന്ന ഒരു ഉദ്യോഗാര്‍ത്ഥിയുടെ സ്വഭാവവും പൂര്‍വ്വകാല ചരിത്രവും തൃപ്തികരമാണെന്ന് സര്‍ക്കാരിന്‌ ബോധ്യമായാല്‍ മാത്രമേ അയാള്‍ക്ക്‌ നിയമനം നല്‍കാവൂ എന്ന് 1958ലെ കേരളാ സ്റ്റേറ്റ്‌ ആന്റ്‌ സബോര്‍ഡിനേറ്റ്‌ സര്‍വീസ്‌ റൂളിലെ10(ബി)(111) ല്‍ പറയുന്നൗ.ഇതു പ്രകാരം നിയമനാധികാരി ഉദ്യോഗാര്‍ത്ഥിയുടെ സ്വഭാവവും പൂര്‍വ്വകാല ചരിത്രവും പരിശോധിച്ച്‌ തൃപ്തികരമാണെന്ന് ഉറപ്പ്‌ വരുത്തേണ്ടതുണ്ട്‌.ഇത്‌ പോലീസ്‌ പരിശോധനാറിപ്പോര്‍ട്ടിലൂടെയാണ്‌.പക്ഷേ ഇപ്രകാരം പോലീസ്‌ പരിശോധന നടത്തി റിപ്പോര്‍ട്ട്‌ ലഭിക്കുന്നതിന്‌ കാലതാമസം വരുമെന്നതിനാല്‍ ഉദ്യോഗാര്‍ത്ഥിക്ക്‌ താല്‍ക്കാലിക നിയമനം നല്‍കുകയും പരിശോധാനാറിപ്പോര്‍ട്ട്‌ ലഭിക്കുമ്പോള്‍ നിയമനം സ്ഥിരപ്പെടുത്തുകയും ചെയ്യുന്നു.അതിനാല്‍ പരിശോധന നടത്തി തൃപ്തികരമാണെന്ന് കണ്ടാല്‍ നിയമനം ക്രമപ്പെടുത്തി നിയമനാധികാരി ഉത്തരവിറക്കണം.ആറുമാസത്തിനകം ഈ നടപടി പൂര്‍ത്തീകരിക്കണം.
അതിനാല്‍ ഇപ്രകാരം സ്വഭാവപരിശോധന നടത്തുന്ന നടപടി നിയമനനടപടികളിലെ ഒരു പ്രധാന ഇനം തന്നെയാണ്‌.ഇതിന്റെ നടപടിക്രമം നിയമനാധികാരിയാണ്‌ പ്രധാനമായും അറിഞ്ഞിരിക്കേണ്ടത്‌.എന്നാല്‍ തന്റെ സര്‍വീസ്‌ ക്രമപ്പെടുത്തേണ്ടതുസംബന്ധിച്ച്‌ ഉദ്യോഗാര്‍ത്ഥിക്ക്‌ പ്രത്യേക താല്‍പ്പര്യം ഉണ്ടാകേണ്ടതുണ്ടല്ലോ?കൂടാതെ ഇതുമായി ബന്ധപ്പെട്ട്‌ ഈ വിഷയം കൈകാര്യം ചെയ്യുന്ന ഗുമസ്തനും അറിയണം.ഈ പാഠം ആ ഉദ്ദേശം മനസ്സില്‍ കരുതിയാണ്‌

ഉദ്യോഗാര്‍ത്ഥിയെ ജോലിയില്‍ പ്രവേശിപ്പിക്കുന്നതിനു മുന്‍പായി സ്വഭാവപരിശോധന നടത്തുന്നതിനാവശ്യമായ അടിസ്ഥാനവിവരങ്ങള്‍ അടങ്ങുന്ന ഫാറം1 പൂരിപ്പിച്ച്‌ ഉദ്യോഗാര്‍ത്ഥിയില്‍ നിന്നും വാങ്ങിയിരിക്കണം.ഉദ്യോഗാര്‍ത്ഥികളെ ശുപാര്‍ശചെയ്യുമ്പോള്‍ ഉദ്യോഗാര്‍ത്ഥിയുടെ തിരിച്ചറിയല്‍ ഫാറങ്ങള്‍ പി.എസ്‌.സി നിയയമനാധികാരിക്ക്‌ നല്‍കണം.ഇതും ഫാറം1 ചേര്‍ത്തും രണ്ടാഴ്ചക്കകം ബന്ധപ്പെട്ട ജില്ലാപോലീസ്‌ സൂപ്രണ്ടിന്‌ നിയയമനാധികാരി എഴുതണം.
പരിശോധനാ നടപടിക്രമങ്ങള്‍
1പോലീസ്‌ റിപ്പോര്‍ട്ട ലഭിച്ചാല്‍ ഉദ്യോഗാര്‍ത്ഥിയുടെ നിയമനം ക്രമപ്പെടുത്തിക്കൊണ്ട്‌ ഉത്തരവ്‌ നിയമനാധികാരി ഇറക്കണം.

2) ഇത്തരത്തില്‍ അറിയിപ്പ്‌ ലഭിക്കാതെ ഈ ഉദ്യോഗാര്‍ത്ഥിയുടെ നിയമനം സ്ഥിരപ്പെടുത്തുവാന്‍ പാടില്ല.പ്രധാനമായും ക്രിമിനല്‍ കേസുകളില്‍ പെട്ടിട്ടുള്ളവരുടെ നിയമനങ്ങളാണ്‌ ഇപ്രകാരം നടപടിക്രമങ്ങള്‍ പാലിക്കേണ്ടതായിട്ടുള്ളൂ.എന്നാല്‍ കോടതി കുറ്റക്കാരനല്ലന്നു കണ്ട ഒരാളുടെ നിയമനം തടയുവാന്‍ പാടില്ല.
3) കുറഞ്ഞകാലത്തേക്ക്‌ എമ്പ്ലോയ്‌ മെന്റ്‌ എക്സ്ചേഞ്ച്‌ വഴിനിയമനം നടത്തുമ്പോള്‍ മേല്‍പറഞ്ഞ നടപടിക്രമങ്ങള്‍ പാലിക്കേണ്ടതില്ല.എന്നാല്‍ സ്വഭാവ ദൂഷ്യമുള്ളവര്‍ക്ക്‌ നിയമനം നല്‍കാന്‍ പാടില്ല.അല്ലെങ്കില്‍ ഒരു ഗസറ്റഡ്‌ ഉദ്യോഗസ്ഥന്‍ നല്‍കുന്ന സ്വഭാവ സര്‍ട്ടിഫിക്കറ്റ്‌ ആവശ്യപ്പെടാവുന്നതാണ്‌.കണ്ടിജന്റ്‌ ജീവനക്കാര്‍ക്കും ഈ നടപടി മതിയാകും.
4) ലാസ്റ്റ്‌ ഗ്രേഡ്‌ ജീവനക്കാര്‍ക്കും സ്വഭാവ പരിശോധന ആവശ്യമില്ല.രണ്ട്‌ ഗസറ്റഡ്‌ ഉദ്യോഗസ്ഥരില്‍ നിന്നും സ്വഭാവ സര്‍ട്ടിഫിക്കറ്റ്‌ ഹാജരാക്കിയാല്‍ മതിയാകും.പക്ഷേ ഈ സര്‍ട്ടിഫിക്കറ്റ്‌ നിയമനം നല്‍കുന്നതിനുമുന്‍പായി വാങ്ങിയിരിക്കണം
5)നിലവില്‍ സംസ്ഥാന സര്‍വീസിലെ സ്ഥിരം ജീവനക്കാര്‍ക്ക്‌ മറ്റൊരു നിയമനം ലഭിച്ചാല്‍ സ്വഭാവ പരിശോധന ആവശ്യമില്ല.
6)സ്വഭാവവും പൂര്‍വ്വകാല ചരിത്രവും തൃപ്തികരമല്ലന്ന് അറിയിച്ചാല്‍ ആ വിവരം ബന്ധപ്പെട്ട ഉദ്യോഗാര്‍ത്ഥിയെ അറിയിക്കണം
അതുകൊണ്ടുതന്നെ നിയമനാധികാരി സ്വന്തമായി ഒരു ഉദ്യോഗാര്‍ത്ഥിയുടേയും സ്വഭാവം പരിശോധിക്കുവാനോ നിയമനം തടയുവാനോ അധികാരമില്ലന്ന് മനസ്സിലാക്കാം

Read more »

HALF PAY LEAVE

അവധികളെതന്നെ രണ്ടായി തരം തിരിക്കാം.സാധാരണ അവധിയും പ്രത്യേക അവധിയും.ആര്‍ജ്ജിതാവധി,അര്‍ദ്ധവേതനാവധി എന്നിവ സാധാരണാവധിയും ആശുപത്രി അവധി പ്രസവാവധി തുടങ്ങിയവ പ്രത്യേക അവധിയുമാണ്‌.സാധാരണാവധികള്‍ സര്‍വീസ്‌ കൂടുന്നതനുസരിച്ച്‌ വര്‍ദ്ധിക്കുകയും ഉപയോഗിക്കുന്നതനുസരിച്ച്‌ കുറയുകയും ചെയ്യുന്നു.എന്നാല്‍ പ്രത്യേക അവധി ആര്‍ജ്ജിക്കുന്നുമില്ല ഉപയോഗിക്കുന്നതനുസരിച്ച്‌ കുറയുന്നുമില്ല.അതിനാല്‍ ഇത്തരം അവധികള്‍ക്ക്‌ പ്രത്യേകം കണക്ക്‌ സൂക്ഷിക്കേണ്ടതില്ല.
അര്‍ദ്ധവേതനാവധി
ഒരു പുര്‍ണ്ണ വര്‍ഷത്തില്‍ ഇരുപത്‌ എന്ന കണക്കില്‍ എല്ലാജീവനക്കാര്‍ക്കും ഈ അവധിക്ക്‌ അര്‍ഹതയുണ്ട്‌.എന്നാല്‍ ഒരു വര്‍ഷഹ്ത്റ്റില്‍ കുറഞ്ഞകാലയളവിലേക്ക്‌ ഈ അവധി ആര്‍ജ്ജിക്കുന്നില്ല.അതേപോലെ വിദേശത്തുപോകുന്നതിനും പഠനാവശ്യഹ്ത്തിനും എടുക്കുന്ന ശൂന്യവേതനാവധിക്കാലത്തും ഈ അവധി ആര്‍ജ്ജിക്കുന്നില്ല.മെഡിക്കല്‍ സര്‍ട്ടിഫിക്കറ്റിന്റെ അടിസ്ഥാനഥ്റ്റിലോ അല്ലാതേയോ അവധി അനുവദിക്കാം.അനുവദിക്കാവുന്ന അവധിക്ക്‌ പരിമിതിയില്ല.ഒരു ജീവനക്കാരന്‍ പ്രവേശനക്കാലത്ത്‌ അവധി എടുക്കേണ്ടിവന്നാല്‍ പ്രവേശനകാലത്തിന്റെ ആരംഭത്തില്‍ അവധി എടുക്കേണ്ടതും തുടര്‍ന്ന് പ്രവേശനകാലം ഉപയോഗിക്കാവുന്നതുമാണ്‌.എന്നാല്‍ ഈ പ്രവേശനകാലത്ത്‌ അവധിവേതനമേ ലഭിക്കുകയുള്ളൂ.അവധി അനുവദിക്കുവാന്‍ അധികാരപ്പെട്ട ഉദ്യോഗസ്ഥന്‌ യുക്തമായകാലയളവിലേക്ക്‌ അവധി അനുവദിക്കാവുന്നതാണ്‌.

മെഡിക്കല്‍ സര്‍ട്ടിഫിക്കറ്റില്‍ അവധി അനുവദിക്കുമ്പോള്‍ അവധി തുടങ്ങുന്ന ദിവസം പൊതുവധിയാണെങ്കില്‍ ആ ദിവസം അവധിക്കണക്കില്‍ പെടുത്തേണ്ടതില്ല.എന്നാല്‍ ഫിറ്റ്‌ നസ്സ്‌ സര്‍ട്ടിഫിക്കറ്റ്‌ പ്രകാരം ജോലിയില്‍ പ്രവേശിക്കേണ്ടതിനോട്‌ ചേര്‍ന്നുവരുന്ന ദിവസം അവദിയായി തന്നെ കണക്കാക്കണം.എന്നാല്‍ ജോലിയില്‍ പ്രവേശിക്കേണ്ടദിവസം പൊതു അവധിയാണെങ്കില്‍ അത്‌ ഉപയോഗിക്കാം.
അവധിവേതനം
1)ആദ്യ 180 ദിവസത്തേക്ക്‌ വീട്ടുവാടകബത്ത്യുള്‍പ്പെടെ അലവന്‍സുകള്‍ അനുവദിക്കാവുന്നതാണ്‌
2)18740 രൂപയില്‍ കവിഞ്ഞ്‌ ശമ്പളം പറ്റുന്ന ജീവനക്കാര്‍ക്ക്‌ പകുതി ശമ്പളവും അതിന്റെ ക്ഷാമബത്ത്യു മാത്രമേ ലഭിക്കൂ
3)18740 രൂപയില്‍ താഴെശമ്പളമുള്ളവര്‍ക്ക്‌ പകുതി ശമ്പളവും മുഴുവന്‍ ക്ഷാമബത്തയും ലഭിക്കും.അതല്ലങ്കില്‍ അടിസ്ഥാനശമ്പളത്തിന്റേയും ക്ഷാമബത്തയുടേയും 65 ശതമാനം ലഭിക്കും.ഇതില്‍ ഏതാണോ കൂടുതല്‍ അത്‌ കൈപ്പറ്റാം
കമ്മ്യൂട്ടഡ്‌ അവധി
ഇത്‌ അര്‍ദ്ധവേതനാവധിയുടെ മറ്റൊരുരൂപം മാത്രമാണ്‌.ഒരു കമ്മ്യൂട്ടഡ്‌ അവധിക്ക്‌ രണ്ട്‌ അര്‍ദ്ധവേതനാവധി എന്ന കണക്കില്‍ കുറവുചെയ്യും.മൂന്ന് വര്‍ഷത്തില്‍ താഴെ സര്‍വീസുള്ള ജീവനക്കാര്‍ക്ക്‌ കമ്മ്യൂടഡ്‌ അവധിക്ക്‌ അര്‍ഹതയില്ല.ഡ്യൂട്ടുയിലാണെങ്കില്‍ ലഭിക്കുന്ന ശമ്പളവും ബത്തകളും അവധിക്കാലത്ത്‌ ലഭിക്കും
ലീവ്‌ നോട്ട്‌ ഡ്യൂ
ഇതും അര്‍ദ്ധവേതനാവധി തന്നെ.പക്ഷേ അവധി എടുക്കുന്ന സമയത്ത്‌ കണക്കില്‍ നില്‍ക്കുന്ന അവധിയല്ല ഇത്‌.ഭാവിയില്‍ ഉണ്ടാകുന്ന അര്‍ദ്ധവേതനാവധി മുന്‍ കൂറായി എടുക്കുന്നതാണിത്‌.ഭാവിയിലെ സര്‍വീസില്‍ ആര്‍ജിക്കുന്ന അവധിയില്‍ നിന്നും കുറവ്‌ ചെയ്യാമെന്ന കരാറിലാണ്‌ ഇത്‌ അനുവദിക്കുന്നത്‌
മറ്റ്‌ നിബന്ധനകള്‍
1)ഭാവിയില്‍ ആര്‍ജ്ജിക്കുവാന്‍ സാധ്യതയുള്ള അവധിയില്‍ കൂടുതല്‍ അനുവദിക്കില്ല.
2) ഒരേ സമയം പരമാവധി 90 ദിവസമേ അനുവദിക്കൂ
3) ആകെ സര്‍വീസില്‍ പരമാവധി 180 ദിവസം മാത്രമേ അനുവദിക്കൂ.എന്നാല്‍ മെഡിക്കല്‍ സര്‍ട്ടിഫിക്കറ്റില്‍ അനുവദിക്കുന്നതിന്‌ ഈ നിബന്ധന ബാധകമല്ല.എന്നാല്‍ ഏതുകണക്കിലായാലും പരമാവധി 360 ദിവസമേ അനുവദിക്കൂ
4) അനുവദിക്കുന്ന ഉദ്യോഗസ്ഥന്റെ വിവേചനം അനുസരിച്ച്‌ അവധി അനുവദിക്കുകയോ നിരസിക്കുകയോ ചെയ്യാം
5) ഒരിക്കല്‍ അനുവദിച്ചാല്‍ പിന്നീട്‌ റദ്ദുചെയ്യാനാകില്ല.അത്‌ തെറ്റാണെങ്കില്‍ പോലും
6) മറ്റ്‌ വേതനം ലഭിക്കാവുന്ന അവധി കണക്കിലില്ലങ്കിലേ ലീവ്‌ നോട്ട്‌ ഡ്യൂ അനുവദിക്കാവൂ
കമ്മ്യൂട്ടേഷന്‍
ഒരിക്കല്‍ അനുവദിച്ച അര്‍ദ്ധവേതനാവധി പിന്നീട്‌ കമ്മ്യൂട്ടഡ്‌ അവധിയായോ തിരിച്ചോ പില്‍ക്കാലത്ത്‌ പരിവര്‍ത്തനം ചെയ്യാം.ഇങ്ങിനെ അനുവദിക്കുമ്പോള്‍ അധികവേതനം കൈപ്പറ്റിയത്‌ തിരിച്ച്‌ അടയ്ക്കണം.എന്നാല്‍ കൂടുതലായി വേതനം ലഭിക്കുമെങ്കില്‍ കൈപ്പറ്റാവുന്നതാണ്‌

Read more »

ശമ്പള പരിഷ്കരണം 2011(Pay Rivision 2011)

1-07-2009 മുതല്‍ സംസ്ഥാന ജീവനക്കാരുടേയും അദ്ധ്യാപകരുടേയും ശമ്പളം പരിഷ്കരിച്ചുകോണ്ട്‌ ഉത്തരവായിരിക്കുകയാണല്ലോ?എന്തുകൊണ്ടും പരിഷ്കരണത്തെപ്പറ്റി വിവിധങ്ങളായ അഭിപ്രായങ്ങള്‍ പലകോണുകളില്‍ നിന്നും ഉയര്‍ന്നിട്ടുണ്ട്‌.പലര്‍ക്കും ശമ്പളം പരിഷ്കരിക്കുവാന്‍ ഇനിയും ധൈര്യം വരുന്നില്ല.എന്തെങ്കിലും അപാകങ്ങള്‍ ഭാവിയില്‍ സംഭവിക്കുമോ നഷ്ടം വരുമോ എന്നെല്ലാമാണ്‌ ആശങ്കകള്‍.അത്‌ സ്വാഭാവികമായും ഏത്‌ പരിഷ്കരണശേഷവും ഉണ്ടാകുന്നസ്വാഭാവിക ആശങ്കകള്‍ മാത്രമാണ്‌.പലപ്പോഴും ഉത്തരവ്‌ മനസ്സിരുത്തി പഠിക്കാത്തതുകൊണ്ടുമാണ്‌.എന്തായാലും ഈ പരിഷ്കരണത്തിന്‌ മേന്മകളും അതേപോലെ അപാകതകളുമുണ്ട്‌.കൃത്യമായും അഞ്ചുവര്‍ഷത്തിനു ശേഷം പരിഷ്കരണം ലഭിക്കുന്നു എന്നതാണ്‌ 2011ലെ പരിഷ്കരണത്തിന്റെ എടുത്തുപറയത്തക്ക മച്ചം.മറ്റൊന്ന് സാമാന്യം ഭേദപ്പെട്ട ഇങ്ക്രിമന്റ്‌ നിരക്കുകള്‍ തന്നിരിക്കുന്നു എന്നതും മെച്ചം തന്നെ.ചില തസ്തികകള്‍ക്ക്‌ രണ്ടു ലെവല്‍ ഉയര്‍ത്തി പുതിയ സ്കെയില്‍ അനുവദിച്ചിട്ടുണ്ട്‌ എന്നതും ശ്രദ്ധേയമാണ്‌.എന്നാല്‍ തീരെ അപാര്യാപ്തമായ വെയിറ്റേജ്‌ തന്നിരിക്കുന്നതു നിമിത്തം സര്‍വീസുള്ളവരും കുറഞ്ഞവരും തമ്മില്‍ ശമ്പളത്തില്‍ വലിയ അന്തരം ഉണ്ടാകുന്നില്ല എന്നത്‌ വലിയ പോരായ്മയാണ്‌.മറ്റൊന്ന് വീട്ടുവാടക ബത്തയുടെ സ്റ്റേജുകളും മെച്ചപ്പെട്ടതല്ല എന്നതാണ്‌.ഇതു നിമിത്തം ക്ലാസ്സ്‌ ഭേദമില്ലാതെ വലിയൊരുവിഭാഗം ഒരേ വീട്ടുവാടകബത്ത വാങ്ങുന്ന സ്ഥിതിവിശേഷമുണ്ട്‌.1-07-2009 നു മുന്‍പ്‌ പ്രമോഷന്‍ കിട്ടിയവരും ശേഷം കിട്ടിയവരും തമ്മില്‍ ഒരേ ശമ്പള സ്റ്റേജില്‍ വരുന്ന വിചിത്രമായ അവസ്ഥയുണ്ട്‌.എക്സൈസില്‍ രണ്ടു കാറ്റഗറിക്കൊഴിച്ച്‌ മെച്ചപ്പെട്ട സ്കെയിലുകള്‍ ലഭിച്ചിട്ടുണ്ട്‌.എന്നാല്‍ അസിസ്റ്റ്ന്റ്‌ എക്സൈസ്‌ ഇന്‍സ്പെക്ടര്‍,എക്സൈസ്‌ ഇന്‍സ്പെക്ടര്‍ തസ്തികകള്‍ക്ക്‌ ലഭിച്ച സ്കെയിലുകള്‍ സന്തോഷം തരുന്നതല്ല.
എങ്ങിനേ ശമ്പളം പരിഷ്കരിക്കാമെന്നു നോക്കാം
ശമ്പളം തിട്ടപ്പെടുത്തുന്നതിനു ഓപ്ഷന്‍ നല്‍കുന്നതിനുമുന്‍പ്‌ ചിലകാര്യങ്ങള്‍ മനസ്സില്‍ വൈയ്ക്കുന്നത്‌ നന്നായിരിക്കും.
1) 1-07-2009 നു ശേഷം ഏതു തീയതി വേണമെങ്കിലും ഓപ്റ്റ്‌ ചെയ്യാമെന്നതിനാല്‍ തെരഞ്ഞെടുക്കുന്ന തീയതിക്ക്‌ വളരേ പ്രാധാന്യമുണ്ട്‌.സര്‍വീസ്‌ കാലത്തിനു വെയ്റ്റേജ്‌ ഉള്ളതിനാല്‍ പൂര്‍ത്തിയാകുന്ന വ്യത്യസ്ഥ വര്‍ഷങ്ങള്‍ പരിഗണനയില്‍ വരണം.8 വര്‍ഷങ്ങള്‍ വരെ വലിയ മാറ്റം പലപ്പോഴും ഉണ്ടാകുന്നില്ലാത്തതിനാല്‍ ഒരു സ്റ്റേജുമാറ്റം കിട്ടുമെങ്കില്‍ അതു വലിയ പ്രയോജനമായിരിക്കും.
2)ഇങ്ക്രിമന്റ്‌ തീയതിയില്‍ അടിസ്ഥാന ശമ്പളം മാറുമെന്നതിനാല്‍ ഓരോ ഇങ്ക്രിമന്റ്‌ തീയതിയിലും ശമ്പളം തിട്ടപ്പെടുത്തു ഉറപ്പുവരുത്തണം.
3) 1-07-2009 നു ശേഷം പ്രമോഷന്‍ ഉണ്ടെങ്കിലോ ഉണ്ടാകുവാന്‍ സാദ്ധ്യത ഉണ്ടെങ്കിലോ തീയതി തെരഞ്ഞടുക്കുമ്പോള്‍ വളരേ ശ്രദ്ധിക്കണം.അതതു തീയതികളില്‍ പ്രത്യേകമായി ശമ്പളം തിട്ടപ്പെടുത്തി നോക്കേണ്ടതാണ്‌.
4) റിട്ടയര്‍മന്റ്‌ തീയതി മാര്‍ച്ച്‌ മാസമായതിനാല്‍ പെന്‍ഷനു ഗുണകരമായ രീതിയില്‍ ശമ്പളം തിട്ടപ്പെടുത്തുന്നത്‌ ഭാവിയില്‍ നന്നായിരിക്കും.കൂടുതല്‍ പെന്‍ഷന്‍ ലഭിക്കുന്നതരത്തില്‍ ശ്രദ്ധിക്കണം എന്നാണ്‌ ഉദ്ദേശിച്ചത്‌.
ശമ്പള നിര്‍ണ്ണയം
ശമ്പളനിര്‍ണ്ണയം നടത്തുന്ന രീതി വളരേ ലളിതമാണ്‌.നോക്കാം
1) 1-07-2009 ലെയോ ഓപ്ഷന്‍ തീയതിയിലേയോ നിലവിലുള്ള അടിസ്ഥാന ശമ്പളം
2) അടിസ്ഥാനശമ്പളത്തിന്റെ 64% ക്ഷാമബത്ത
3)അടിസ്ഥാന ശമ്പളത്തിന്റെ 10% (കുറഞ്ഞത്‌ 1000രൂപ) തുക ഫിറ്റ്‌മന്റ്‌ ബെനഫിറ്റ്‌
4) ഓരോ പൂര്‍ത്തിയായ വര്‍ഷത്തിനും അടിസ്ഥാന ശമ്പളത്തിന്റെ അരശതമാനം വെയിറ്റേജ്‌
മുകളില്‍ പറഞ്ഞ നാലുതുകയും കൂട്ടുക.
ഇനി പരിഷ്കരിച്ച ശമ്പളസ്കേയില്‍ കണ്ടുപിടിക്കുക.മുകളില്‍ കണ്ടുപിടിച്ച തുകക്കു മുകളില്‍ വരുന്ന ശമ്പളസ്കൈയിലിലെ അടുത്ത സ്റ്റേജില്‍ ശമ്പളം നിജപ്പെടുത്താം
ഉദാഹരണം
എക്സൈസ്‌ ഗാര്‍ഡ്‌(ഹയര്‍ ഗ്രേഡ്‌) ശ്രീ,ജോസഫിന്റെ ശമ്പളം നിജപ്പെടുത്തിയിരിക്കുന്നത്‌ നോക്കുക
ജോസഫ്‌ 20-06-2002 ല്‍ എക്സൈസ്‌ ഗാര്‍ഡായി സര്‍വീസില്‍ പ്രവേശിച്ചു.ജനനതീയതി 08-03-1974.1-07-2009ലെ അടിസ്ഥാന ശമ്പളം രൂ.6380.20-06-2010 ല്‍ രൂ 6680-10790 സ്കെയില്‍ പ്രിവന്റീവ്‌ ആഫീസറുടെ സ്കൈയിലില്‍ ഹയര്‍ ഗ്രേഡ്‌ ലഭിച്ചു,ശമ്പളം രൂ,6680ല്‍ നിജപ്പെടുത്തി.1-07-2009ലെ ശമ്പള സ്കെയില്‍ രൂ.5250-8390 ആണ്‌.വിവിധ ഓപ്ഷന്‍ തീയതില്‍ ശമ്പളം എങ്ങി നെ നിജപ്പെടുത്താമെന്നു നോക്കാം
1) ഓപ്ഷന്‍ തീയതി 1-07-2009.
പരിഷ്കരിച്ചസ്കെയില്‍രൂ10480-279-11020-300-12220-330-13540-360-14980-400-16980-440-18300

അടിസ്ഥാന ശമ്പളം-6380
ക്ഷാമബത്ത 64%-4083
ഫിറ്റ്‌മന്റ്‌ ബനഫിറ്റ്‌-കുറഞ്ഞത്‌-1000
വെയിറ്റേജ്‌-7 വര്‍ഷത്തിന്‌-6380*1/2%*4=223
ആകെ-രൂ.11686
അടുത്ത സ്റ്റേജ്‌-രൂ 11920
1-07-09 ലെ ശമ്പളം-രൂ 11920

20-06-2010 ല്‍ ഗ്രേഡ്‌-സ്കയില്‍ രൂ 13900-24040
ഇവിടെ ശമ്പളം നിശ്ചയിക്കുമ്പോള്‍ 13900ല്‍ തന്നെ ലഭിക്കുന്നു'അടുത്ത ഇങ്ക്രിമന്റ്‌ 1-06-2011ല്‍
2) ഓപ്ഷന്‍ തീയതി 20-06-2010 ഗ്രേഡ്‌ ലഭിച്ച തീയതി
അടിസ്ഥാന ശമ്പളം-6680
ക്ഷാമബത്ത-4275
ഫിറ്റ്‌ മെന്റ്‌-1000
വെയിറ്റേജ്‌-267
ആകെ-12222
അടുത്ത്‌ സ്റ്റേജ്‌-13900
അതിനാല്‍ 1-07-2009 ഓപ്റ്റുചെയ്യുന്നതായിരിക്കും മെച്ചമെന്ന് കാണാം.

Read more »

ജനറല്‍ പ്രോവിഡന്റ്‌ ഫണ്ട്‌ ചട്ടങ്ങള്‍ (The General Provident fund(kerala) Rules

1964 ഏപ്രില്‍ 1 നാണ്‌ ജനറല്‍ പ്രോവിഡന്റ്‌ ചട്ടങ്ങള്‍ നിലവില്‍ വന്നത്‌.ഈ പാഠത്തില്‍ ജി.പി.എഫ്‌ സംബന്ധിച്ച്‌ അത്യാവശ്യം ഒരു ജീവനക്കാരന്‍ അറിഞ്ഞിരിക്കേണ്ടതായ കാര്യങ്ങള്‍ മാത്രം പ്രതിപാദിക്കുന്നുള്ളൂ.
സംസ്ഥാന സര്‍വീസിലെ എതൊരു ജീവനക്കരനും ജി.പി.എഫില്‍ അംഗത്വം എടുത്തിരിക്കണം.മാസം തോറും ഒരു തുക ഫണ്ടില്‍ നിക്ഷേപിക്കണം.ഇത്‌ അതതുമാസത്തെ ശമ്പളത്തില്‍ നിന്നും കുറവുചെയ്ത്‌ ഫണ്ടില്‍ വരവുവയ്ക്കുന്നു.ഫണ്ടിലെ തുകക്ക്‌ അതത്‌ ഏപ്രില്‍ മാസത്തില്‍ സര്‍ക്കാര്‍ നിശ്ചയിക്കുന്ന പലിശ ലഭിക്കുന്നതാണ്‌.ഫണ്ടില്‍ നിന്നും ആവശ്യങ്ങള്‍ക്കായി പണം താത്‌ കാലികമായോ സ്ഥിരമായോ പിന്‍ വലിക്കാവുന്നതാണ്‌.ഫണ്ടില്‍ വരിസംഖ്യ അടയ്ക്കുന്നതും വായ്പ എടുക്കുന്നതും സംബന്ധിച്ച്‌ അത്യാവശ്യം അറിയേണ്ടത്‌ താഴെ കൊടുക്കുന്നു.

വരിസംഖ്യ

1. വരിസംഖ്യ അംഗങ്ങള്‍ക്ക്‌ നിശ്ചയിക്കാവുന്നതാണ്‌.എന്നാല്‍ അത്‌ വേതനത്തിന്റെ 6 ശതമാനത്തില്‍ കുറയാനോ അടിസ്ഥാനശമ്പളത്തില്‍ അധികരിക്കാനോ പാടില്ല.
2. സസ്പെന്‍ഷനില്‍ ഇരിക്കുന്ന ഒരു ഉദ്യോഗസ്ഥന്‍ വരിസംഖ്യ അടയ്ക്കേണ്ടതില്ല.
3. അര്‍ദ്ധവേതനത്തിലോ ശൂന്യവേതനത്തിലോ അവധിയിലിരിക്കുമ്പോള്‍ വരിസംഖ്യ അടയ്ക്കേണ്ടതില്ല.
4. സസ്പെന്‍ഷനു ശേഷം കുടിശ്ശികയായ വരിസംഖ്യ വേണമെങ്കില്‍ ഒന്നിച്ച്‌ അടയ്ക്കാവുന്നതാണ്‌
5. സര്‍വീസിന്റെ അവസാന മൂന്നുമാസത്തില്‍ വരിസംഖ്യ അടയ്ക്കാന്‍ അനുവാദമില്ല.
6. പെന്‍ഷനാകുന്നതിന്‌ ഒരു വര്‍ഷം സര്‍വീസ്‌ അവസാനിക്കുമ്പോള്‍ എപ്പോള്‍ വേണമെങ്കിലും വരിസംഖ്യ നിര്‍ത്താവുന്നതാണ്‌.ചട്ടം 10എ അനുസരിച്ച്‌ ഇതിനായി ഓപ്ഷന്‍ നല്‍കണം.
7. വര്‍ഷത്തില്‍ 2 പ്രാവശ്യം വരിസംഖ്യ വര്‍ദ്ധിപ്പിക്കാവുന്നതും ഒരു തവണ കുറവുചെയ്യാവുന്നതുമാണ്‌.

ഫണ്ടില്‍ നിന്നും വായ്പ

ചട്ടം 16 പ്രകാരം ഫണ്ടില്‍ നിന്നും വരിക്കാരണ്‌ താത്‌ കാലിക വായ്പ എടുക്കാവുന്നതാണ്‌.എന്നാല്‍ ഇത്‌ ചട്ടം അനുശാസിക്കുന്ന ആവശ്യങ്ങള്‍ക്കുമാത്രമായി നിജപ്പെടുത്തിയിരിക്കുന്നു.ഇത്‌ സംബന്ധിച്ച്‌ ശ്രദ്ധിക്കേണ്ട സംഗതികള്‍ താഴെ പറയുന്നു.

1. അനുവദിക്കാനധികാരമുള്ള ഉദ്യോഗസ്ഥന്‌ തൃപ്തികരമാണന്ന് തോന്നുന്ന സാഹചര്യങ്ങളില്‍ മാത്രം വായ്പ അനുവദിച്ചാല്‍ മതിയാകും.
2. താഴെ പറയുന്ന ആവശ്യങ്ങള്‍ക്ക്‌ വായ്പ്പ അനുവദിക്കാം

• തന്റേയോ ആശ്രിതരുടേയോ കുടുംബതിലെ അംഗത്തിന്റേയോ ദീര്‍ഘകാലമായുള്ള അസുഖത്തിന്റെ ചികിത്സക്കായി.
• തന്റേയോ കുടുംബാംഗത്തിന്റേയോ ഉപരി പഠനത്തിനായി
• വിവാഹം,ശവസംസ്കാരം മറ്റ്‌ മതപരമായ ചടങ്ങുകള്‍ക്ക്‌ ആവശ്യമായ യുക്തിപരമായതുക
• സ്വന്തംഭാഗം തെളിയിക്കുന്നതിന്‌ ഒരു വ്യവഹാരം നടത്തുന്നതിനുള്ള ചെലവ്‌ വഹിക്കുന്നതിന്‌
• ടെലിവിഷന്‍,കമ്പ്യുട്ടര്‍ തുടങ്ങിയ ഗൃ ഹോപകരണങ്ങള്‍ വാങ്ങുന്നതിന്‌

1. മൂന്നുമാസം മാത്രം സര്‍വീസ്‌ അവശേഷിക്കുന്ന വരിക്കാരന്‌ വായ്പ അനുവദിക്കുവാന്‍ പാടില്ല
2. വായ്പ അനുവദിച്ചശേഷം ആറുമാസം കഴിയാതെ മറ്റൊരു വായ്പ അനുവദിക്കുവാന്‍ പാടില്ല
3. ഫണ്ടില്‍ നീക്കിയിരുപ്പുള്ള തുകയുടെ പരമാവധി 75 ശതമാനം തുക വായ്പ്പയായി അനുവദിക്കാവുന്നതാണ്‌
4. ഒരു വായ്പ നിലനില്‍ക്കുമ്പോള്‍ പിന്‍/വലിക്കാവുന്ന പരമാവധിതുക കണ്ടുപിടിക്കുവാന്‍ ഈ സൂത്രവാക്യം ഉപയോഗിക്കാം.
5. 3a-b/4.ഇതില്‍ a=നീക്കിയിരുപ്പുള്ള തുകയും b= മുന്‍ വായ്പയുടെ അടച്ചുതീര്‍ക്കുവാനുള്ള ശേഷിക്കുന്ന തുകയുമാണ്‌
6. സസ്പെന്‍ഷനില്‍ ഇരിക്കുന്ന ഉദ്യോഗസ്ഥന്‍ വായ്പ തിരിച്ചടക്കാന്‍ സന്നദ്ധനാണെങ്കില്‍ വായ്പ അനുവദിക്കാവുന്നതാണ്‌
7. വായ്പ തുക പരമാവധി 36 തവണകളായി തിരിച്ചടയ്ക്കാവുന്നതാണ്‌
8. വരിക്കാരന്‌ രണ്ടോ അതിലധികമോ തവണകള്‍ ഒരുമിച്ച്‌ തിരിച്ചടക്കുവാന്‍ തീരുമാനിക്കാവുന്നതാണ്‌
9. സസ്പെന്‍ഷനിലിരിക്കുന്നതോ അര്‍ദ്ധവേതനത്തിലോ ശൂന്യവേതനത്തിലോ അവധിയിലിരിക്കുന്നതോ ആയ ഉദ്യോഗസ്ഥന്റെ വായ്പ തവണകള്‍ വേതനത്തില്‍ നിന്നും ഈടാക്കേണ്ടതില്ല.എന്നാല്‍ രേഖാമൂലം ആവശ്യപ്പെട്ടാല്‍ ഈടാക്കാവുന്നതാണ്‌

തിരിച്ചടയ്കേണ്ടാത്ത വായ്പ്പ

ഫണ്ടില്‍ നിന്നും തിരിച്ചടയ്ക്കേണ്ടാത്ത വ്യവസ്ഥയില്‍ തുക പിന്‍ വലിക്കാവുന്നതാണ്‌.ഇതു സംബന്ധിച്ച വ്യവസ്ഥകള്‍ ഇപ്രകാരമാണ്‌.

1. 10 വര്‍ഷം സര്‍വീസ്‌ പൂര്‍ത്തിയാക്കിയ വരിക്കാരന്‌ വായ്പ അനുവദിക്കാവുന്നതാണ്‌.
2. മക്കളുടെ ഉന്നതപഠനം,വിവാഹം, കൂടാതെ ആശ്രിതര്‍ക്കുണ്ടാകുന്ന രോഗങ്ങളുടെ ചികില്‍സക്ക്‌,വീട്‌ വാങ്ങുന്നതിന്‌,വീടുപണിയുന്നതിന്‌,വീടിന്റെ അറ്റകുറ്റപ്പണികള്‍ക്ക്‌ വാഹനം വാങ്ങുന്നതിന്‌, തുടങ്ങിയ ആവശ്യങ്ങള്‍ക്ക്‌ വായ്പ അനുവദിക്കാവുന്നതാണ്‌.
3. ചികില്‍സ ഒഴിച്ച്‌ മറ്റാവശ്യങ്ങള്‍ക്ക്‌ ഒരു തവണ മാത്രമെ വായ്പ അനുവദിക്കൂ.
4. ഒരു താല്‍ക്കാലിക വായ്പ പിന്നീട്‌ തിരിച്ചടയ്ക്കേണ്ടാത്തതായ വായ്പയായി പരിവര്‍ത്തനം ചെയ്യാവുന്നതാണ്‌.എന്നാല്‍ അക്കൗണ്ടന്റ്‌ ജനറലിന്റെ അനുവാദം ലഭിച്ച ശേഷമേ വായ്പ തിരിച്ചടവ്‌ നിര്‍ത്താവൂ.

ഫണ്ട്‌ അവസാനിപ്പിക്കല്‍

പെന്‍ഷന്‍ പറ്റുന്നതിനു മുന്‍പായി വരിക്കാരന്‌ ഫണ്ട്‌ അവസാനിപ്പിക്കാവുന്നതാണ്‌.ഇതിനായി അവസാന പ്രതിമാസ വരിസംഖ്യ അടച്ചതിനു ശേഷം അപേക്ഷ സമര്‍പ്പിക്കാവുന്നതാണ്‌.ആഫീസ്‌ തലവന്‍ ഗസറ്റഡ്‌ ആണെങ്കില്‍ അപേക്ഷ പൂര്‍ണ്ണമായും തയ്യാറാക്കിയ ശേഷം ആഫീസ്‌ തലവന്‍ നേരിട്ട്‌ അക്കൗണ്ടന്റ്‌ ജനറലിന്‌ സമര്‍പ്പിച്ചാല്‍ മതിയാകും.അല്ലാത്ത പക്ഷം അടുത്ത ഗസറ്റഡ്‌ ഉദ്യോഗസ്ഥന്‍ മേലൊപ്പ്‌ വച്ച്‌ അയച്ചാല്‍ മതിയാകും.

Read more »

ആര്‍ജ്ജിതാവധി (Earned Leave)

ജീവനക്കാരെ സംബന്ധിച്ചിടത്തോളം അവധികളില്‍ ഏറ്റവും പ്രധാനപ്പെട്ടതാണ്‌ ആര്‍ജ്ജിതാവധി.അവധിക്കാലത്തിന്‌ അര്‍ഹതയില്ലാത്തവര്‍ക്ക്‌ വര്‍ഷംതോറും 30 ആര്‍ജ്ജിതാവധി തിരികെ നല്‍കിവേതനം കൈപ്പറ്റാമെന്നതാണ്‌ ഈ അവധിയെ ആകര്‍ഷകമാക്കുന്നത്‌.കൂടാതെ കാഷ്വല്‍ അവധി ഒഴിച്ചാല്‍ മുഴുവന്‍ അവധിക്കാല വേതനവും ലഭിക്കുന്നത്‌ ആര്‍ജ്ജിതാവധിക്കാലത്താണ്‌.ആര്‍ജ്ജിതാവധിയെ സംബന്ധിച്ചുള്ള ചില പ്രധാന നിബന്ധനകള്‍ താഴെ കൊടുക്കുന്നു.

• 1)ഡ്യൂട്ടിയിലുള്ള ഓരോ 11 ദിവസത്തിനും ഒരു അവധി എന്നനിലയില്‍ ഈ അവധി ആര്‍ജ്ജിക്കുന്നു.എന്നാല്‍ സര്‍വീസില്‍ പ്രവേശിച്ച ആദ്യവര്‍ഷത്തില്‍ 22ന്‌ ഒന്ന് എന്ന നിലയിലേ ലഭിക്കൂ.എന്നാല്‍ മൂന്നു വര്‍ഷത്തിനു ശേഷം ഇതു പുനര്‍നിര്‍ണ്ണയിച്ച്‌ 11 ന്‌ ഒന്ന് എന്ന കണക്കിന്‌ ചേര്‍ക്കാവുന്നതാണ്‌.

• 2)പരമാവധി 300 ദിവസത്തെ ആര്‍ജ്ജിതാവധിയാണ്‌ കണക്കില്‍ നില്‍ക്കുകയുള്ളൂ.കൂടാതെ ഒറ്റത്തവണ 180 ല്‍ കൂടുതല്‍ അവധി എടുക്കാനാകില്ല.എന്നാല്‍ പെന്‍ഷനു മുന്‍പായി 300 എണ്ണം എടുക്കാവുന്നതാണാ്‌.

• 3) ഒരിക്കല്‍ അനുവദിച്ച ആര്‍ജ്ജിതാവധി പിന്നീട്‌ മറ്റൊന്നായി പരിവര്‍ത്തനം ചെയ്യാനാകില്ല.

• 4) പാര്‍ട്ട്‌ ടൈം ജീവനക്കാര്‍ക്ക്‌ 22 ന്‌ ഒന്ന് എന്നകണക്കില്‍ പരമാവധി 15 ദിവസം ഒരു വര്‍ഷം ആര്‍ജ്ജിതാവധി ലഭിക്കും.

• 5) താല്‍ക്കാലിക ജീവനക്കാര്‍ക്ക്‌ 11ല്‍ ഒന്ന് എന്നനിലയില്‍ ഒരു വര്‍ഷത്തേക്ക്‌ 15 അവധി ലഭിക്കും.ഇവര്‍ക്ക്‌ മെഡിക്കല്‍ സര്‍ട്ടിഫിക്കറ്റില്‍ 15 അവധി ഉപയോഗിക്കാം

അവധി വില്‍പ്പന

• 1) ഒരു സാമ്പത്തിക വര്‍ഷം കണക്കില്‍ നില്‍ക്കുന്ന അവധിയില്‍ നിന്നും 30 ആര്‍ജ്ജിതാവധി സറണ്ടര്‍ ചെയ്യാവുന്നതും അവധി വേതനം കൈപ്പറ്റാവുന്നതുമാണ്‌.ഇത്‌ പാര്‍ട്‌ ടൈം ജീവനക്കാര്‍ക്കും കണക്കില്‍ ലഭ്യമാണങ്കില്‍ ബാധകമാണ്‌.

• 2)താല്‍ക്കാലിക ജീവനക്കാര്‍ക്ക്‌ 15 ദിവസം അവധി സറണ്ടര്‍ ചെയ്യാവുന്നതാണ്‌.

• 3) 30 ല്‍ താഴെ അവധിയും ഒരു സാമ്പത്തികവര്‍ഷത്തില്‍ സറണ്ടര്‍ ചെയ്യാം.എന്നാല്‍ ഒരു തവണ മാത്രമേ അനുവദിക്കൂ.

• 4)പില്‍ക്കാല പ്രാബല്യത്തില്‍ അവധി സറണ്ടര്‍ ചെയ്യാനാകില്ല.എന്നാല്‍ പെന്‍ഷന്‍ പറ്റിയവര്‍,സസ്പെന്‍ഷനു ശേഷം ജോലിയില്‍ പ്രവേശിച്ചവര്‍ എന്നിവര്‍ക്ക്‌ പില്‍ക്കാല പ്രാബല്യത്തില്‍ സറണ്ടര്‍ ചെയ്യാം

• 5)സസ്പെന്‍ഷനിലിരിക്കുന്ന ജീവനക്കാരന്‌ അവധി സറണ്ടര്‍ ചെയ്യാന്‍ അനുവാദമില്ല.എന്നാല്‍ ജോലിയില്‍ തിരികെ പ്രവേശിച്ചശേഷം സസ്പെന്‍ഷന്‍ കാലത്തിനേക്കാള്‍ കൂടുതല്‍ അവധി കണക്കിലുണ്ടെങ്കില്‍ അവധി സറണ്ടര്‍ ചെയ്യാം.

• 6)സറണ്ടര്‍ വേതനത്തില്‍ കോമ്പന്‍സേറ്ററി അലവന്‍സുകള്‍ ചേര്‍ക്കാം.എന്നാല്‍ പ്രത്യേകജോലിക്ക്‌ നല്‍കുന്ന അല്വന്‍സുകള്‍ അനുവദനീയമല്ല.ഉദാ-ഡ്രൈവര്‍മാരുടെ സ്പെഷ്യല്‍ അലവന്‍സ്‌.

• 7) റിട്ടയര്‍ ചെയ്ത ജീവനക്കാര്‍ക്ക്‌ പരമാവധി 300 ദിവസത്തെ അവധി സറണ്ടര്‍ ചെയ്യാം.ഇതിന്‌ പ്രത്യേക അപേക്ഷ നല്‍കേണ്ടതില്ല.എന്നാല്‍ രാജിവച്ചതോ നീക്കം ചെയ്തതോ ആയ ജീവനക്കാര്‍ക്ക്‌ സറണ്ടറിന്‌ അര്‍ഹതയില്ല.

Read more »